BUTUAN CITY – Gipa-abot na lang sa grupo ni Senador Alan Peter Cayetano ang resulta sa ilang giduso sa Supreme Court ug Petition for Certiorari alang sa pagdeklara nga walay bili ang sesyon sa Senado niadtong Hunyo 3 ning tuiga.
Kauban ni Cayetano sa 83-palid nga petisyon ang pipila ka mga senador sama nila Loren Legarda, Pia Cayetano, Jinggoy Estrada, Bong Go, Rodante Marcoleta, Imee Marcos, Robin Padilla, ug Camille Villar samtang wala’y apil sa mga petitioners sila Senador Joel Villanueva ug Mark Villar.
Kahinumdoman nga nadayon ang sesyon niadtong Hunyo 3 tungod sa pagtunga ni Senador Francis Escudero, nga naghatag og quorum. Sa maong sesyon, napili si Senador Sherwin ‘Win’ Gatchalian isip Senate President Pro Tempore ug acting Senate President.
Gipangayo usab sa petisyon nga magpagawas ang Korte Suprema og dinalian nga status quo ante order aron mapugngan ang tanan nga aksyon sa “Gatchalian bloc,” lakip na ang mga komite nga ilang gipangulohan.
Sumala pa nila, ang isyu makahatag og dili maayo nga mga sangputanan nga dili na maka-ayo sa hustisya.
Dugang pa nila, kritikal ang oras sa petisyon tungod kay ang quorum nagsilbing pundasyon sa usa ka serye sa mga aksyon nga naka-apekto sa pagdumala sa Senado, organisasyon sa mga komite, mga imbestigasyon sa lehislatura, ug mga proseso sa impeachment.
Nasayrang kaganina atol sa special session, napili na si Gatchalian isip Senate President ug nag-assign na usab og chairmanship og mga membro sa ilang mga komite.
