BUTUAN CITY – Mala-umon si Senadora Imee Marcos nga ihunong una sa gobyerno ang rice importation karong gitangtang na sa iyang igsoong si Agriculture Secretary ug Pangulong Ferdinand ‘Bongbong’ Marcos Jr. ang price ceiling alang sa regular ug well-milled rice.
Sigon sa senadora, insakto ang desisyon sa pangulo pagtangtang sa price cap sa bugas tungod kay duha ka semana nang anaa sa harvest season ang nasud. Kung mag-import matud pa, kinahanglang himuon kini sa mga buwan sa Hulyo ug Agusto kondiin wala’y kwarta ang mga mag-uuma nga magamit sa ilang pagpananom.
Dugang pa sa senadora, iyang gihingusgan ang paghatag gayod og yuta ngadto sa mga mag-uumang wala’y kaugalingong yutang matikad aron masiguro ang saktong produksyon sa humay. Kini gawas pa sa angayang himuon sa gobyerno nga pagmontar og large-scale irrigation project dinhi sa Mindanao.
