BUTUAN CITY – Gipangayo ni Senador Ronald “Bato” dela Rosa nga ibutang siya sa kustodiya sa Philippine National Police (PNP),sumala ni Acting Senate Sergeant-at-Arms Mao Aplasca.
Sigon ni Aplasca nga nadungog niya ang hangyu sa senador sa usa ka meeting kauban si PNP Chief Police General Jose Melencio Nartatez Jr. ug Interior and Local Government Secretary Jonvic Remulla.
Sumala sa opisyal, nahitabo ang pagpulong human ang tensyon nga miputos sa Senado niadtong Miyerkules.
Mahinumdumang gitaho nga si Dela Rosa, mibiya sa Senado sa kaadlawon sa Huwebes, pipila ka oras human makadungog ang mga buto sa armas sa palibot sa dakbalay sa Senado dungan sa pagpatuman sa lockdown sa lugar.
Una nang gibutyag ni Pangulong Ferdinand Marcos Jr. nga walay direktiba nga arestuhon ang senador.
Si Dela Rosa ang lakip sa mga indibidwal nga dunay nagtunhay nga arrest warrant gikan sa International Criminal Court (ICC) mahitungod sa kasong crimes against humanity nga dunay kalambigitan sa anti-illegal drug campaign niadtong nakalabay nga administrasyon ni kanhe Pangulong Rodrigo Duterte.
Niadtong Lunes, gibutang si Dela Rosa sa protective custody sa Senado human gisulayan nga ipatuman sa National Bureau of Investigation ang nasangpit nga arrest warrant.
