BUTUAN CITY – Paspas ang paglihok karon sa Senado human nga gipili sa minority si Senador Sherwin Gatchalian isip bag-ong Senate President Pro Tempore human ang usa ka dramatikong sesyon nga gi-boycott sa grupo ni Senate President Alan Peter Cayetano.
Napadayon ang sesyon tungod sa pag-abot ni Senador Francis “Chiz” Escudero, nga mao ra ang bugtong miyembro sa majority bloc nga nitambong.
Ang iyang pagkahimong ikaduhang lider sa Senado hulip kang Senadora Loren Legarda, nagtimaan sa usa ka kritikal nga pagbalhin sa gahum sa chamber.
Madumdumang 11 ka minority senators ang present sa plenaryo dihang misulod si Senador Escudero sa hall nga nakahatag og quorum tungod kay mi-abot naman sila sa 12 ka mga senador. Tungod niini nga kalambuan, gideklara nga bakante ang tanang posisyon sa Senado ug human sa pagkapili kang Gatchalian isip Senate President Pro Tempore, si Senador Miguel Zubiri usab ang gipili nga Majority Leader samtang si Ray Bantug ang Senate Secretary.
Ang pag-boycott sa majority bloc ug ang pagdakop ni Senador Jinggoy Estrada sa kasong plunder ug padayong pagtago-tago ni Senador Ronald ‘Bato’ de la Rosa naghatag og dakong epekto sa kredibilidad ug operasyon sa Senado.
Ang Senate President Pro Tempore mao ang ikaduhang labing taas nga posisyon sa Senado, ug mosilbi nga acting Senate President kung wala ang incumbent.
Sa kasaysayan, ang posisyon kasagaran gihatag sa usa ka senior ug respetado nga senador aron magpadayon ang stability sa chamber.
