BUTUAN CITY – Ang pagsakripisyo sa tanang mga na-andan natong maghatag og kalipay sa atong inadlaw-adlaw nga gimbuhaton, maoy angayang tamdan ning panahon sa Semana Santa.
Kini ang mensahe ni Butuan City Vice Mayor Reynante Desiata ngadto sa tanan dihang eksklusibong nakahinabi ning sibyahan.
Gipadayag sa besi mayor nga ning panahon sa Semana Santa, break una ang tanan sa na-andang trabaho ug mas tutukan ang paghatag og bili sa sakripisyong gihimo ni Hesu Kristo sa iyang kinabuhi bugti sa kaluwasan sa atong kalag. Karon matud pa ang tukmang panahon nga muhatag kita og pasaylo ngadto sa mga nakasala kanato ingon man pagpangayo og pasaylo ngadto sa atong mga nasad-an.
Niining panahuna usab angayang tamdan sa tanan ang pagpu-asa dili lang diha sa pagkaon isip pakighi-usa sa mga pasakit ni Hesus kondili apil na sa pagpuasa sa pagpakasala.
Samtang subay sa nasinatian nato karong krisis, giklaro sa besi mayor nga wala’y bisan usa nga exempted niini sa tibuok kalibutan.
Gani kini matud pa ang hinungdan nga gi-trim down karon sa city government ang pipila ka mga na-andan nilang mga kalihukan apil na ang pagbiyahe ug ang pagpanghingusog sa work-from-home aron makaminos sa gasto.
Karon matud pa ang saktong panahon nga isalamin sa tanan ang hatud nga mensahe sa krisis karon, diha sa atong inadlaw-adlaw nga panginabuhian.
