BUTUAN CITY- Lauman ang dako-dakong rollback sa presyo sa mga produktong petrolyo sa Pilipinas sa sunod semana tungod sa paghinay sa tensiyon tali sa Estados Unidos ug Iran, nga nakaapekto sa presyo sa krudo sa internasyonal nga merkado.
Base sa lihok sa Mean of Platts Singapore (MOPS) ug sa average nga foreign exchange rate sa miaging upat ka adlaw, gilauman nga mokunhod og P4.50 hangtod P5.00 kada litro ang presyo sa diesel ug gasolina.
Sumala sa source gikan sa industriya sa lana, ang pagkunhod sa geopolitical risk premium tungod sa paglaum sa diplomatikong kasulbaran sa panagbangi maoy usa sa mga hinungdan sa pag-ubos sa presyo sa krudo ug mga fuel product sa Asia, bisan pa sa nagpabiling risgo sa pagbiyahe sa mga barko sa Red Sea.
Dugang pa, nakatabang usab ang mas lig-on nga piso batok sa dolyar sa paghatag og dugang nga downward pressure sa lokal nga presyo sa petrolyo.
