BUTUAN CITY – Gilubong na si Rene Clert ‘Bobet’ Baterbonia kaganina sa bag-ong Talacogon Municipal Memorial Park human sa funeral mass sa gymnasium kondiin siya ang unang gilubong sa maong sam-ang nga nahimutang sa Brgy Labnig.
Gawas sa iyang pamilya, mga kabanay, higala, teammates, fans, supporters ug mga kababayan nga naghatag sa sa ilang katapusang respeto kagahapon hangtud na kaganina sa iyang paglubong, duna usa’y pipila ka mga dignitaries.
Isip paghatag og pasidungog ug paghinumdom sa iyang legasiya nga gibilin, gideklara sa lokal nga kagamhanan sa Talacogon ang Hunyo 8 kansa maoang petsa sa iyang pagkamatay, isip “Rene Clert ‘Bobet’ Baterbonia Day” sa Talacogon, aron sa matag-tuig mahinumdoman ang iyang kontribusyon sa sports ug sa komunidad. Kini gawas pa sa pag-ila sa lalawigan sa Agusan del Sur kaniya isip sports icon sa lalawigan.
Gani sa pagpamulong ni Agusan del Sur 1st District Rep Alfel Bascug atol sa pakig‑uban niya sa mga seremonya, opisyal niining gihatag ang pagpasidungog kang Rene, isip ‘AgSurnon Sports Icon’ tungod sa iyang gidala nga dungog sa ilang lalawigan.
Aduna usa’y gihatag nga Certificate of Recognition ang provincial government sa Agusan del Sur nga nagpasidungog sa pamilya ni Rene.
Madumdumang nalumos-patay siya atol sa team-building activity sa Dipaculao, Aurora, Hunyo 8, kauban ang Nigerian teammate nga si Divine Adili.
