BUTUAN CITY – Malampuson ang gikasa nga operasyon sa mga personahe sa Criminal Investigation and Detection Group kon CIDG-Caraga may kalabutan sa illegal nga drugas mga alas 8:00 kagabii sa North Town Subdivision, Barangay Libertad ning siyudad sa Butuan.
Gihimo ang operasyon pinaagi sa pagpatuman sa search warrant number 265-2019 nga gipagawas ni Hon. Francis Rafil, Executive judge sa municipal trial court in cities, 10th judicial region branch 2, Butuan City sa kalapasan sa RA 9165 o Dangerous drug act.
Sa pagpanguna sa Team Leader sa CIDG-Caraga nga si Police Capt. Jethro Mepaña og pakig-alayon sa Butuan City Police Station-3 pinaagi ni Police Chief Master Sergeant Juvy Balanon, nadakpan ang suspek nga si Daryll James Cagampang, usa ka registered nurse nga karun negosyante og tubigan, menyu nga taga Block 4 Lot 66 sa nasangpit nga subdivision.
Nakuha gikan sa posisyon sa suspetsado ang 3 ka mga dagkong sachet sa gitoohang shabu og laing 7 ka gagmay nga sachet sa susamang epektus.
Lakip sa nakuha ang usa ka unit sap unto 38 nga kalibre sa pistol nga dunay 4 ka mga buhing bala, usa ka unit usab sa punto 22 nga kalibre apil na ang pipila ka mga illegal drug paraphernalia og cash nga 6-mil 820 pesos.
Gihan-ay na karun ang mga kasong ipasaka batuk sa suspek nga karun gikustudiya na sa CIDG-Caraga uban sa mga nakuhang butang alang sa tukmang disposasyon.
