BUTUAN CITY – Tungod sa kapakyas pagtambong sa emergency meeting human sa gamhanang magnitude 6.7 na linog niadtong Pebrero 10, gideklara sa Sangguniang Panlalawigan sa Surigao del Norte nga ‘persona non grata’ ang acting regional director sa Department of Education kon DepEd-Caraga.
Gi-aprubahan sa Sangguniang Panlalawigan ang Resolution No. 51 nga nag-censure kang DepEd-Caragaf Director May Eclar tungod sa kapakyas pagtubag sa emergency meeting niadtong Pebrero 17 nga gipatawag ni Surigao del Norte Governor Sol Matugas.
Tumong unta sa pag-imbitar kang Director Eclar mao ang paglantaw sa kaayuhan sa public education sector, ilabina sa integridad sa mga public school buildings, ingon man ang trauma nga nasinatian sa mga magtutudlo og mga estudyante, labaw sa tanan ang ilang kaluwasan og ang pagbalik sa klase.
Nakalatid pa sa SP resolution ang wala pagpakig-alayon ni Eclar sa imbitasyon ni Governor Matugas aron unta masayran ang rason wala niya pagsanong sa maong tigom.
Ang gipakita matud pang taras ni Eclar sukwahi sa gipakita nila Pangulong Rodrigo Duterte og DepEd Secretary Leonor Briones kinsa mibisita pa sa maong lalawigan, nagpakita sa iyang ka-arogante og kangil-ad sa batasan. (Beth Ruiz)
