BUTUAN CITY – Mitala og kasaysayan sa iyang debut ang ang grade 6 pupil nga si Charles Nathan Boneo sa Region IV-A human mihakot og upat ka mga gold medals dihang upat ka higayon niyang gibu-ak ang record sa swimming event sa elementary boys category subay na sa nagpadayong Palarong Pambansa 2026 sa Prosperidad, Agusan del Sur.
Dili malimtan nga kasaysayan ang natala ni Boneo ang pagbu-ak sa 26 ka tuig na nga record sa 50-meter butterfly kansa katapusang natala niadtong tuig 2000 sa Bacolod City human niya kini nalangoy sa oras nga 27.77-segundos.
Nakuha usab niya ang gold medal alang sa 500-meter freestyle, 100-meter freestyle ug 4 X 100 mini relay gawas pa sa bronze medal nga iyang nakuha alang sa 4 X 50-meter freestyle relay.
Dili matukib ang iyang gibating kalipay ilabina nga dugay na niya kining pangandoy dungan sa iyang pagpasalamat sa tanang misuporta kaniya ug sa iyang coach nga wala’y hunong nga nagsakripisyo aron lang iyang makab-ot ang iyang kada-ugan karon.
