BUTUAN CITY – Gipasegarbo sa probinsiya sa Agusan Del Sur ang mga medalya nga ihatag sa mga modaog sa ika-66 nga edisyon sa Palarong Pambansa tungod kay dunay adunay mga hinimong ribbon nga binuhat mismo sa mga babayeng AgSurnon IP (Indigenous People) gikan sa lungsod sa Loreto.
Ang Loreto, nga usa ka lungsod sa mga Manobo sa Agusan del Sur, adunay panginabuhian nga programa nga gitawag og Hinang Project nga nagtumong sa pagpalambo sa artisanal skills sa mga lumad nga babaye samtang naghatag usab kanila og maayong panginabuhi.
Ang “Hinang” usa ka lokal nga pulong sa Manobo nga nagpasabot og “paghimo,” nga naghulagway sa handmade nga pagkamamugnaon nga ginapalambo sa proyekto.
Ang handmade beadwork nga gihimo sa mga talentadong AgSurnon IP nga kababayen-an gikan sa maong inisyatiba sa Loreto mao ang gamiton nga ribbon alang sa mga medalya nga isul-ob sa liog sa mga student-athlete nga molampos sa nasudnong dula.
Gikumpirma kini sa mga organizers pinaagi sa opisyal nilang post sa social media, diin nagpasalamat ug naghatag og pagkilala sa proyekto sa Loreto ubos sa Culture and Arts Development Division sa Municipal Tourism Office.
Ang “Hinang Project” nagtudlo sa mga IP women sa batakang beadwork skills nga ilang magamit sa pagdekorar sa lain-laing handcrafted products sama sa mga bag, dekorasyon, ug accessories.
