BUTUAN CITY – Napasakaan na og kasong kriminal samtang gi-andam na usab ang kasong administratibo batuk sa pulis nga nagpabuto sa iyang pistola ning nakalabay’ng adlaw human ang lalis nila sa iyang ka-ipon.
Sa eksklusibong pakighinabi sa Bombo Radyo Butuan, gipadayag ni Police Captain Rodel Dorado, station commander sa Butuan City Police Station kon BCPS-4, kagahapon sa buntag dihang napasaka ang kasong alarm scandal through Illegal discharge of firearms batuk kang Police Corporal Nelson Jagmoc, 35-anyos, residente sa Brgy. Los Angeles ning siyudad.
Apan nakakuha gilayon og resolution gikan sa piskalya ang suspek pagkahapon nga nagmandong ipagawas kini gikan sa prisuhan samtang gipaabot ang pagdungog sa iyang kaso rasong balik na kini sa iyang duty.
Pagbutyag pa sa opisyal nga siya mismo ang complainant sa criminal case samtang ang Philippine National Police usab sa kasong administratibo.
Nasayran nga gireklamo sa silingan si Police Corporal Jagmoc human nagpabuto sa iyang pistola ning nakalabay’ng alas 2:00 sa hapona dihang nakig-inom kini uban sa iyang uyuan ug sa iyang bayaw.
