BUTUAN CITY – Gitangtang na ang usa ka rookie policeman nga na-assign sa elite Special Action Force kon SAF sa Philippine National Police kon PNP human nagpabuto sa iyang armas atol sa Christmas season.
Gawas kang Patrolman Loreto Padual Abrio, gi-relieve usab isip commanding officer sa 145th Special Action Company si PCapt. John Louise Pacres tungod sa command responsibility.
Si Abrio gipasakaan og administrative charges tungod sa iyang pagpabuto og armas sa Barangay Tuao North, Bagabag, Nueva Vizcaya niadtong Disyembre 30. Sigon ni PNP chief information officer Col. Redrico Maranan, ang relief order kabahin sa istriktong kamanduan ni PNP chief Gen. Rodolfo Azurin, Jr. nga likayan ang paggamit sa armas sa pagsa-ulog sa Pasko ug pagsugat sa bag-ong tuig.
Giklaro ni Maranan, nakatala sila og upat ka mga kaso sa indiscriminate firing gikan sa Disyembre 30 hangtud sa Enero 1 ning tuiga didto sa Iloilo, Manila ug Quezon City.
Naka-aresto usab sila og usa ka membero sa Philippine Coast Guard ug duha ka mga sibilyan, gawas pa sa laing 42 nga gi-aresto tungod sa pagpamaligya og mga illegal firecrackers sukad niadtong Disyembre 16.
