BUTUAN CITY – Kamulo pa og himo’g public transportation plan ang planner og technical personnel sa Land Transportation and Franchising Regulatory Board kon LTFRB-Caraga isip pagpangandam ugaling hingpit nang ipailalom sa Modified Enhanced Community Quarantine kon MECQ ang 40 ka barangay sa dakbayan sa Butuan.
Sa eksklusibong pakighinabi sa Bombo Radyo Butuan, gibutyag ni Maria Kristina Cassion, OIC Regional Director sa maong buhatan, padayon pa nilang gihulat ang ipagawas nga executive order sa Office of the City Mayor mahitungod sa pagpa-ilalom sa Butuan sa MECQ ilabina nga base sa palisiya sa Inter-agency Task Force kon IATF, maoy ilang sundon, partikular ang temporaryong pagsuspende public transportation sa mga lugar nga anaa sa MECQ.
Lakip sa masuspinde ang operasyon mao ang mga bus, van, jeepney og taxi samtang ang mga tricycle depende na sa LGU-Butuan tungod kay sakop nila kini.
Sumala pa ni Cassion, nagpadala na sila og sulat sa LGU-Butuan diin gi-imporma niini ang mahitabo ugaling mahinayon ang nasangpit nga sugyot.
Lakip sa ilang sulat ang ilang suhestiyon nga magpatuman na lamang og localized lockdown og dili larason ang tanang 40 ka barangay. Kini tungod sa kadakog epekto sa katawhan ilabina kay magpabiling abli ang mga business establishment nga sakop sa maong mga barangay.
Gipadayag usab ni Cassion nga sayu silang nagpagawas og advisory alang sa mga ma-apektuhang establishment sa temporaryong pagsuspinde sa transportasyon.
Sumala pa ni Cassion nga pwede silang mo-kontak sa public transportation aron dunay kontrata silang mamugna isip shuttle service apan kinahanglan gihapon nilang molukat og special permit gikan sa LTFRB kansa wala’y bayad nga ihatag sa gustong mag-hire og sakyanan nga maoy maghatud sa ilang mga trabahante.
