BUTUAN CITY – Andam na ang Police Regional Office kon PRO-13 alang sa simultaneous nga paglusad ugmang adlawa, Enero 9 sa Commission on Elections kon COMELEC checkpoint kansa timaan na sa pagsugod sa election period.
Sa eksklusibong pakighinabi sa Bombo Radyo Butuan, gipadayag ni PRO-13 spokesperson Major Dorothy Tumulak, base sa guidelines, ang tanang mga imontar nga checkpoints ubos na sa pagdumala unya sa COMELEC kondiin apil sa mu-man niini ang taga-COMELEC ug abagan usab sa taga-Armed Forces of the Philippines kon AFP.
Sama sa ilang regular checkpoint, kinahanglang makita dinhi ang pwersa nga nanguna kondiin anaa ang pangalan sa hepe sa kapulisan diin ilawom ang nag-man sa checkpoint ingon man ang pangalan sa hingtungdang COMELEC office ug kinahanglang naka-uniporme ang mga mag-man niini.
Mag-agad matud pa sa sitwasyon sa usa ka lokalidad o kaha sa urgency ang pagmontar og checkpoint ilabina kung himuon ba kining kada-adlaw o dili.
Ilawom sa election period, bawal na ang pagdala-dala og armas kung wala ka tuguti sa balaud nga magdala niini sama niadtong mga law enforcement personnel.
Kanselado usab niining panahuna ang gipang-isyung permit to carry firearms tungod kay ang gitugutan lang mao kadtong aprubado sa COMELEC.
