BUTUAN CITY – Nagtuo ang Kilusang Mangbubukid ng Pilipinas kon KMP nga kaya pang ubsan ang price cap nga gimando sa nasudnong kagamhanan base sa gipagawas nga Executive Order No. 39 ni Pangulong Ferdinand ‘Bongbong’ Marcos Jr.
Sa eksklusibong pakighinabi sa Bombo Radyo Butuan, gipadayag ni Ronnie Manalo, secretary general sa Kilusang Mangbubukid ng Pilipinas nga ulahi na ang lakang sa gobyerno tungod kay dugay na nilang gipanawagan sa gobyerno nga magpatuman og price ceiling.
Dili matud pa makabenepisyo niini ang mga mag-uuma tungod ang pagpatuman sa gobyerno niini, gihimo lang human nga dili na mapugngan ang padayong pagtaas sa presyo sa bugas kansa bunga matud pa sa dugay nang pagpasagad sa Department of Agriculture.
Ang apektado matud pa niini mao ang mga rice retailers tungod kay dili man gihapon mahilabtan ang mga rice traders kansa maoy angayang bungkagon ka-uban ang mga rice cartels kauban ang mga hoarders ug smugglers.
Dugang pa ni Manalo, kaya pang ubsan ang presyo sa kada-kilo sa regular milled rice ug well milled rice nga anaa sa 41-pisos ug 45-pisos kung sundon lang ang rule of thumb sa pagtakda sa presyo niini.
Gihimo pa niining pananglitan kung napalit sa mga rice traders sa median price nga P19 hangtud P22 kada kilo ang humay ug idugang pa ang mga gasto sa milling, drying, hauling, transportasyon ug uban pa, kung basehan ang rule of thumb, dapat anaa sa P30 hangtud P37.40 lang ang presyo sa kada kilo sa bugas.
.
