BUTUAN CITY – Nagsugod na pagmahal ang presyo sa karneng baboy sa may Salvador Calo Public Market sa Langihan area tungod sa pagmahal na usab sa bikil sa mga meat vendors sa gipamalit nilang buhing baboy.
Sa eksklusibong pakighinabi sa Bombo Radyo Butuan, gipadayag sa meat vendor nga si Eizabeth Acidilla nga ning mi-aging mga semana pa misaka og ginagmay ang presyo sa ilang pamalitong buhing baboy apan midako na ang pagsaka nga mi-abot na sa 163-pesos matag-kilo gikan sa kanhi 150-pesos.
Tungod sa maong pagsaka sa farm gate price rason nga wala usab sila’y mahimo kondili tas-an usab ang presyo sa ilang baligyang karne.
Gidugang pa ni Acidilla, sinugdanan pa lang kini tungod kay siguradong mas musaka pa ang presyo niini ilabina nga nagsingabot na ang Christmas holiday.
Bisan og kada-semana na ang gisaka sa presyo sa ilang palit sa buhing baboy, apan dili sila basta-bastang mupasaka sa presyo sa kada-kilo sa ilang baligyang karne tungod kay makuratan matud pa ang mga konsumidor.
Nagsugod ang pagmahal sa farm gate price sa buhing baboy tungod sa pagpangompra na usab sa taga-Manila og mga buhing baboy dinhi sa Mindanao.
Sa pagkakaron, dagan-dagan pa ang presyo sa ilang mga baligyang karne depende sa parte sa lawas sa baboy nga mu-abot sa 260 hangtud 290-pesos matag-kilo.
Posible matud pang mu-abot sa kapin 300-pesos ang presyo sa karneng baboy samtang magkaduol na ang holiday season, susama sa nangaging mga tuig.
