BUTUAN CITY – Gikonsidera nga “reasonable” sa usa ka grupo sa mga mag-uuma ang pagbana-bana nga muabot sa P60 hangtud sa P62 ang presyo sa kada kilo sa bugas pag-abot sa Setyembre.
Sa pakighinabi kay Magsasaka Partylist Chairman Atty. Argel Cabatbat nga bisan og dunay pagtaas sa presyo, makatabang kini sa mga mag-uuma aron makabawi sa padayon nga pagmahal sa mga gastuson sa produksyon, ilabina sa abono.
Bisan paman gitin-aw ni Cabatbat nga wala pa gihapon nagpasabot kini sa dakong kita para sa mga mag-uuma tungod kay nagpabiling taas ang presyo sa farm inputs.
Kung magdaginot usab sa abono, seguradong mokunhod ang ani og mas makaapekto sa ilang kita.
Naglaum usab ang grupo nga dili molapas pa sa P60 hangtud P62 ang presyo sa bugas aron dili usab mabug-atan ang mga mamalitay.
