BUTUAN CITY – Gibana-banang mukabat sa 200-mil pesos ang damyos sa usa ka pay loader human kini gisilaban sa duha ka wala mailang mga lalaki didto sa Sitio Lower Sangay, Brgy. Anomar, Surigao City.
Migawas sa inisyal nga imbestigasyon sa ginsakpan sa Butuan City Police Station nga duha ka mga lalaki ang miduol sa maong heavy equipment dihang mipahulay sa usa ka tulda ang mga tawong nagdala niini alang sa usa ka construction project.
Partikular matud pang giduol sa wala pa mailang suspek ang makina nga bahin sa maong sakyanan dayong dagkot hangtud nga mi-abot na sa driver’s seat ang kalayo.
Base sa ilang pakighinabi ngadto sa tag-iya niining si Rey Gupit Radin, 39 anyos, negosyante ug residente sa P-3 Brgy. Cagniog, Surigao City, mukabat matud pa sa P3.9M ang kantidad sa nasangpit nga heavy equipment.
