BUTUAN CITY – Nagmandu si Pangulong Ferdinand Marcos Jr. sa mga ahensya sa gobyerno nga gelayong tabangan ang mga komunidad nga naapektuhan sa ashfall gikan sa Mayon Volcano, partikular sa mga lungsod sa Guinobatan ug Camalig sa lalawigan sa Albay.
Sumala sa Presidential Communications Office (PCO), sobsob na ang gihimong response operations sa gobyerno aron maprotektahan ang panglawas sa publiko, maseguro ang kaluwasan sa mga residente, ug mapabiling abli ang mga kalsada ug importanteng serbisyo sa mga apektadong lugar.
Nanguna ang Department of Public Works and Highways (DPWH) sa clearing operations aron kuhaon ang baga nga abo sa mga nag-unang kalsada ug masiguro ang luwas nga pagbiyahe sa mga residente ug emergency responders.
Samtang naghatag usab og tabang ang Department of Social Welfare and Development (DSWD) sa mga pamilyang anaa sa evacuation centers.
Lakip niini ang liboang family food packs, ready-to-eat meals, ug uban pang relief supplies nga naka-preposition sa tibook Bicol Region.
Nanghatag na usab ang DSWD Field Office 5 og ready-to-eat food boxes ug sleeping mats, samtang giandam ang mobile kitchen aron makaluto og init nga pagkaon ugaling magdugay ang pagpabilin sa mga evacuee.
Sumala sa DSWD, miabot na sa 39.6 milyones pesos ang nahatag nga ayuda lakip na ang 11.3 milyones pesos para sa Emergency Cash Transfer ug 28.3 milyones pesos sa ilalom sa Cash-for-Work program nga napahimuslan sa kapin 2-mil ka maguuma nga naapektuhan sa aktibidad sa bulkan.
Nag-deploy usab ang Department of Health (DOH) og N95 masks, mobile clinics, ug water stations aron tabangan ang mga problemang panglawas sama sa ubo, lisud nga pagginhawa ug iritasyon sa mata nga hatud sa ashfall.
Sa tabang usab sa Department of the Interior and Local Government (DILG), gipakatag ang Bureau of Fire Protection (BFP) para sa water spraying ug paglimpiyo sa abo sa mga komunidad.
Gipangunahan sa Office of Civil Defense (OCD) ug sa National Disaster Risk Reduction and Management Council (NDRRMC) ang hugot nga pagpatuman sa evacuation ug padayon nga monitoring sa mga high-risk area.
Gimandu usab sa Pangulo ang makuting pagbantay sa mga sapa ug agasanan sa tubig tungod sa hulga sa lahar, ilabina kung makasinati og kusog nga pag-ulan.
Samtang gitambagan usab ang mga residente nga magpabiling alerto, magpuyo sa sulod sa balay hangtud mahimo, magsuot og protective mask, ug sundon ang mga abiso sa ilang lokal nga kagamhanan.
