BUTUAN CITY – Karon nang adlawa sugdan pagtupok ang mga healthcare workers ning siyudad sa Butuan og Sinovac COVID-19 nga sugdan karong adlawa sa mga level 2 hospitals ning siyudad nga mao ang Butuan Medical Center, MJ Santos Hospital ug Butuan Doctor’s Hospital.
Sa eksklusibong pakighinabi sa Bombo Radyo Butuan, gibutyag ni Michicko de Jesus ang tigpamaba sa LGU-Butuan nga ang unang ospital nga adtu-an sa mga personahe sa Department of Health kon DOH-Caraga mao ang Butuan Medical Center kondiin muabot sa kapin 300 ka mga staff ang target nila nga bakunahan sulod sa tulo ka adlaw.
Gibutyag usab niini nga simultaneous ang pagpamakuna karung adlawa sa tulo ka mga ospital kondiin ang mismong team lang usab sa matag-ospital ang mutupok sa ilang mga personahe.
Dugang pa ni de Jesus, maal-umon ang DOH nga magpabakuna ang target nilang personahe sa matag-ospital aron maprotektahan ang mga niini ilabina nga sila ang unang musugat sa mga admission samtang kadtong health worker nga mubalibad sa bakuna mahimong sa katapusang listahan na kini malakip human nga mabakunahan ang tanang prayoridad subay na usab sa guidelines sa DOH ug IATF.
