BUTUAN CITY – Pangpamilya lamang ang pagsaulog ug wala’y enggrandeng seleberasyon sa pinakadako ug tradisyunal nga Chinese New Year sa Hebei Province sa China karong adlawa.
Sa pakighinabi sa Bombo Radyo Butuan kang John Lloyd Dillinger, usa ka Cabadbaranon ug nagtudlo karon sa usa ka Canadian school sa Tangshan City sa Hebei Province, mga 1,500-kilometros ang gilay-on gikan sa Wuhan City, gipadayag niining bisan aduna gihapo’y hulga sa Covid-19, magpadayon gihapon ang pagsugat sa mga Chinese sa ilang pinakadakong selebrasyon.
Ning tuiga pangpamilya lang ang selebrasyon sanglit limitado pa gihapon ang ilang paglihok-lihok apil na ang mass gatherings human subling gipa-ilalom sa lockdown ang capital City nga iyang nahimutangan.
Sumala ni Dillinger, taliwa nga halos balik na sa normal ang ubang lugar sa China, nagpabilin gihapon ang hulga sa pagkaylap sa virus sa Hebei Province ug apil sa gimando sa ilang lokal nga kagamhanan ang dili una pagpasulod sa isdang salmon ilabian ang nga frozen products nga gika-ingong carrier matud pa sa virus.
Pabiling usab ang tambag sa ilang gobyerno nga gawas sa face mask mugamit usab og alcohol o sanitizer aron makalikay sa nasangpit ga virus.
Kung kaniadto naandan sa mga kaparehong Pilipino nga magsuroy-suroy sa Chinese New Year karon nagpundo nalang sila sa ilang mga pinuy-anan.
