BUTUAN CITY – Hugot nga gikondena sa mga lumad sa San Miguel, Surigao del Sur ang sunod-sunod nga pagpatay sa mga rebeldeng New People’s Army kon NPA sa mga tribal leaders ug mga membro sa Indigenous People kon IPs human ang pag-ambush patay kagahapon kang Datu Jomar Bocales, ang Indigenous People’s Mandatory Representative kon IPMR sa lungsod sa Lianga sa susamang lalawigan.
Sa eksklusibong pakighinabi sa Bombo Radyo Butuan, gipadayag ni Datu Rico Maca, ang IPMR sa lungsod sa San Miguel, gi-atangan matud pa sa gibana-banang 15 ka mga rebeldeng NPA ang ilang pagkanaog sa Brgy. San Isidro rason nga nadamay ug na-apil sa pagkamatay ang ka-uban niining usa ka CAFGU member nga gi-ila pa sa apilyedong Villanueva.
Alayon niini, mihangyo na sila sa kasundaluhan ug sa kapulisan nga hugtan ang paghatag kanila og seguridad ug pagtabang kanla ilabina sa ilang komunidad tungod kay nabalaka nga sila ang main target sa mga rebelde.
Gitu-uhan niining diversionary tactics kini sa mga rebelde subay sa engkwentrong natigayon sa bukirang bahin matud pa sa Cabadbaran City aron mabahin ang atensyon sa mg otoridad.
Sumala pa ni Datu Rico Maca sa eksklusibong pakighinabi ning sibyahan, si Datu Jomar Bocales nga usa ka kanhi rebeldeng NPA, mao ang mibarog ug nanghingusog sa pagpasira sa community schools nga Alternative Learning Center for Agricultural and Livelihood Development (Alcadev) ug ang Tribal Filipino Program of Surigao del Sur (TRIFPSS).
Ang nasangpit nga mga tunghaan gi-alegahang training grounds sa mga communist insurgents ug gidudahang mao usab ang motibo sa nasangpit nga ambush.
