BUTUAN CITY – Epektibo ang pagpa-ilalom sa lokal nga kagamhanan ning siyudad sa Butuan sa 33 sa 86 ka mga barangay ngadto sa modified enhanced community quarantine kon MECQ, pila ka adlaw human unang gipa-ilalom sa Inter-Agency Task Force ngadto general community quarantine kon GCQ.
Kini ang assessment ni City Administrator Reynante Desiata dihang gisukna kalabot sa tigom nila kagahapon sa Regional Task Force on COVID-19 One Caraga Shield.
Sa eksklusibong pakighinabi sa Bombo Radyo Butuan, gipadayag ni Desiata nga gi-uyunan sa One Caraga Shield nga sugod ning adlawa, ipadayon gihapon ang pagpa-ilalom sa 33 ka mga barangay ngadto sa MECQ hangtud na sa Hulyo 15.
Gipasabot sa opisyal nga wala’y laing tumong niini ang city government kondili mao ang pagpugong lamang sa paggawas sa mga tawo sa nasangpit nga mga barangay aron ma-contain ang pagkaylap sa coronavirus.
Sigon sa opisyal, sukad gipa-ilalom sa MECQ ang nasangpit nga mga barangay, mikunhod ang ihap sa mga Butuanong nataptan sa makamatay nga sakit.
Pamatuod niini ang katapusang mga kaso nga parehong mga locally stranded individuals kon LSIs ng nangabot ning siyudad og wala na’y local tranmission.
Gikalipay usab sa opisyal ang epektibong contact-tracing nga ilang gihimo tungod kay na-contain nila kini human nga nagnegatibo sa rapid ug swab tests ang mga tawong nakahugoy-hugoy sa mga COVID-19 positives.
Tungod niini, wala pa’y plano ang city government nga lu-agan ang quarantine measures nga ilang gipatuman aron dili kita masusama sa Cebu CIty nga padayong misaka ang mga kaso niini tungod sa kagahi sa ulo sa mga residente.
Adiser lamang matud pa lu-agan ang quarantine measures kung makitang kontrolado na ang mga kaso sa ingon mabalik na ang pagpakusog usab sa dagan sa ekonomiya ning siyudad.
