BUTUAN CITY – Pormal na usab nga giablihan pinaagi sa ribbon cutting ceremony ang Night Market nga kabahin sa selebrasyon sa Balangay Festival 2026.
Dinhe mapalit ang nagkadaiyang pagkaon ug produkto, uban sa mga kalingawan matag gabii, diin pwede usab kining tambayan sa katawhan ug mga bisita nga gustong mabati ang festive nga kalihokan sa syudad.
Nahimong mas makahuluganon ang kalihokan pinaagi sa Ceremonial Project Turnover sa Butuan United Sustainable Livelihood Program (SLP) Association sa Department of Social Welfare and Development (DSWD).
Nanguna sa ceremonial key turnover sila Mayor Law Fortun ug DSWD Regional Director Mari-Flor Dollaga, diin nakadawat og ₱900,000 ang asosasyon nga gidumala ni President Ronnie H. Mondejar.
Adunay inflatable playground sa lugar nga maghatag og kalipay sa mga kabataan hangtod sa Mayo 7, 2026.
Padayon ang suporta sa City Government sa micro ug small entrepreneurs, samtang gipakusgan ang turismo ug ekonomiya sa dakbayan atol sa Balangay Festival 2026.
