BUTUAN CITY – Gibana-banang mukabat sa otso ngadto sa 10-milyunes pesos ang damyos nga mugna sa pagka-ugdaw sa Timber City Academy nga midamay pa sa kasikbit nga Prince Hotel kansa partially burnt sa may Montilla Boulevard ning siyudad sa Butuan.
Sa eksklusibong pakighinabi sa Bombo Radyo Butuan, gipadayag ni fire investigator FO3 Ben Sergio Pelletero, deputy operations officer sa Bureau of Fire Protection kon BFP-Caraga nga bisan og karaan na ang maong Chinese school apan tungod kay commercial building kini uban sa nadamay nga hotel, rason sa dako nilang estimate sa damyos.
Sa pagkakaron, padayon ang ilang pag-establisar og mga ebidensya sa gigikanan sa kalayo pinaagi sa nagpadayon nilang imbestigasyon.
Nasayrang nadawat nila ang fire call pasado alas-9:10 kagabii gikan kang PO3 Noel Sagado sa Butuan City Police Station 1 rason nga gipadala gilayon sila sa maong dapit kondiin ila pang na-abtan nga gamay pa ang kalayo apan paspas nga mikaylap.
Usa sa ila karong gitutukan mao ang gipadayag sa school guard nga nakadungog siya og buto gikan sa computer laboratory adiser mi-ulbo ang kalayo.
Aron makalikay sa sunog, nanawagan si FO3 Pelletero ngadto sa tanan nga kanunay nga huna-hunaon ang fire safety awareness tungod kay dili lamang matud pa kini ilang concern kondili sa tanan.
Gawas niini, kinahangaln usab nga huna-hunaon kanunay nga ang pglikay sa sunog, kinahanglang inadlaw-adlawon ug dili kay matag-bulan lang sa Marso nga mao ang Fire Prevention Month.
