BUTUAN CITY – Duna’y igong buffer stocks sa bugas ang National Food Authority kon NFA-Caraga nga kayang mu-supply higayong ma-igo sa kalamidad ang rehiyon sama sa bagyo ilabina nga anaa na kita sa ‘Ber’ month.
Kini base na usab sa ilang tahas nga seguraduhong wala’y magutman nga katawhan tungod kay apil man ang maong ahensya sa mga gitahasan paghatag og seguridad sa pagkaon ngadto sa mga Filipino.
Gibutyag ni regional director Veralou de Vera nga sa pagkakaron, base sa ilang imbentaryo, duna pa sila’y 77-mil ka mga sako palay nga naka-stocks sa ilang mga bodega sa Agusan ug Surigao provinces nga kung magaling na, mu-abot kini sa 55-mil ka sakong bugas.
Giklaro sa opisyal nga ang ilang buffer stocks mga local rice nga ilang gipalit sa mga local farmers ilabina nga wala na sila mag-import pa og bugas sukad napapasar ang Rice Tarrification Law.
Magpadayon matud pa ang ilang pagpalit og bugas sa mga local farmers aron masiguro nga duna’y igong supply niini ang rehiyon dili lang panahon sa kalamidad kondili sa adlaw’ng tanan.
