BUTUAN CITY – Pursigido ang usa ka negosyante nga kasuhan ang usa ka ulitawong midapay sa iyang nawong human niya kini gisita dihang gisitsitan siya sa iyang pagdalikyat sa panimalay sa iyang kliyente.
Naila ang reklamanteng si Klevin Bartolaba, 31-anyos, residente sa Purok 3, Brgy. Imadejas ning syudad samtang ang suspek usab nailang si Niño Napuco, 37-anyos, residente sa Estacio Village sa susamang barangay.
Sa eksklusibong pakighinabi sa Bombo Radyo Butuan, gipadayag ni Bartolaba nga dihang pa-uli na siya bandang alas-dies kagabii, kalit lang siyang giduol sa suspek og gidapay ang iyang dagway hinungdan sa paghubag niini.
Gi-settle pa sila sa iyang kliyente apan pursigido siyang buhatan og legal nga aksyon ang gihimo kaniya aron mahatagan og leksyon ang suspek ug dili na kini mahimo sa uban.
Nasayran pa nga naka-inom ang suspek rason nga temporaryo kining gitanggong sa Butuan City Police Station 3.
