BUTUAN CITY – Giklaro sa Police Regional Office kon PRO 13 nga walay hazing nga nahitabo kalabot sa hinungdan sa na-angkong mga fatal injuries sa ulo ang ilang usa ka police trainee nga miresulta sa kamatayon niini.
Sa pakighinabi sa Bombo Radyo Butuan, gibutyag ni Police Maj. Renel Serrano, Public Information Officer sa PRO 13, kabahin sa unom ka bulan nga Public Safety Field Training Program kon PSFTP ang sports fest sa Regional Training Center, sa Brgy. Lipata, Surigao City.
Gitin-aw niini nga purely accident ug walay hazing nga nahitabo kang James Polistico, residente sa Purok 13, Brgy. Poblacion Sibagat, Agusan del Sur.
Gipamugos pa sa opisyal nga ilang gi-monitor ang mga lihok sa ilang mga ginsakpan ilabina ang ilang gipangbuhat sa mga bag-ong police nga nipa-ilamlom og traning.
Gidugang sa opisyal nga base na usab sa report nga gipa-abot kanila sa training director sa nasangpit nga training center, nasayran nga niadtong gabii sa Disyembre 26, 2019 na-collapse si Polistico ug dali kining gidala sa usa ka balay-tambalan sa Surigao City apan pag-abot didto ni-angkon matod ang mga doctor nga dili nila kaya ang kaso sa pasyente rason nga gi-refer sa usa ka pribadong ospital dinhi sa syudad sa Butuan ug gilayong gipailalom sa operasyon.
Nahuman matod ang operasyon bandang ala-1:35 sa buntag sa Disyembre 27, ug gidala sa recovery room aron obserbahan ingon man sa dugang pagtambal apan bandang alas-10:45 sa buntag naglisod kini sa paginhawa ug daling gitabang sa mga attending physician diin bandang alas-11:20 sa buntag wala na kini nakaya pa sa mga doktor rason sa pagkabugto sa iyang hinulamang kinabuhi .
Nasayrang na-diagnose nga duna’y brain herniation, right hemisphere, ug acute subdural hematoma bihemisphere contusion ang sangpit nga police trainee.
Naghatag na usab si Police Regional Office 13 Director Brigadier General Joselito Esquivel, Jr, og tabang pinansyal ngadto sa nagbangotan niining pamilya atol sa pagduaw niini sa iyang haya.
