BUTUAN CITY – Nakumpirmang natigayon diay sa Sarnimian Inland Resort Purok- 1, Brgy. Poblacion, lungsod sa Rosario, Agusan del Sur ang nag-viral nga pool drowning video nga nagpakita sa pagkalumos sa usa ka bayong-bayong human gituklod sa iyang mga higala padulong sa swimming pool human kini gituyok-tuyok sa makadaghang higayon.
Base sa record sa Rosario Municipal Police Station, midangop sa ilang buhatan ning mi-aging alas-siete sa gabii, si Cecil Valdez Agramon, 34-anyos, residente sa Purok 2, Brgy. Imelda, lungsod sa Bunawan sa susamang lalawigan aron ipatala ang pagkalumos sa iyang 16-anyos lang nga anak nga si Ralph niadto pang Lunes sa alas-tres sa hapon.
Nasayrang mi-uban matud pa ang biktima sa pagsa-ulog sa birthday sa higala niining si Richard uban sa pipila pa nila ka mga minor-de-edad nga higala.
Apil sa ilang gikalingawan ang pagtuyok-tuyok sa iyang anak sa makadaghang higayon dayong tuklod niini sa swimming pool nga duna’y giladmong 10 ka tiil hinungdan sa wala na niini pagtunga sulod sa pipila ka minutos nga makitang gipasagdan lang sa sinugdanan.
Dihang wala na gyod mitunga, adiser pa kini gisalom sa mga barkada uban na sa life guard sa maong resort ug daling gidala sa DO Plaza Memorial Hospital aron katambalan.
