BUTUAN CITY – Mga kasong paglapas sa sections 11 ug 12 sa Article 2 sa Republic Act 9165 ang kasong atubangon sa regional top priority target nga si Retchie Lopez Bantilan alyas Dodong, 26-anyos, ulitawo ug residente sa Purok 9, Bingkilan, Brgy. San Vicente ning siyudad sa Butuan.
Kini human milampos ang gipahigayong anti-illegal drugs operation pasado alas-10:28 kagabii human nga nakuha gikan sa iyang posisyon ang 100-gramos sa suspected shabu nga gibana-banang nagkantidad og 680-mil pesos.
Sa eksklusibong pakighinabi sa Bombo Radyo Butuan, gipadayag ni Butuan City Police Office chief information officer PCaptain Anne Cubio, ang maong mga ilegal na drugas nga gilangkuban sa 18 ka mga dagko ug 5 ka gagmay’ng sachets, gisulod pa sa mga putos sa junk foods nga mao ray ilang ibilin samtang ang kwarta, ipadala pinaagi sa GCash.
Samtang padayon usab nga gitun-an sa ilang buhatan ang mga modus sa mga drug personalities aron dili sila ma-isahan sama sa padayon usab nilang pagsuta kung asa gikan ang ilang ginapayuhot nga ilegal nga druga.
Nasayrang gihimo ang anti-illegal drug operations sa mga sakop sa City Intelligence Unit sa Butuan City Drug Enforcement Unit pagpanguna ni PMajor Randy Azote human ang pila ka adlaw nga positibong surveillance.
