BUTUAN CITY – Gibalhin sa house arrest ang kanhe lider sa Myanmar nga si Aung San Suu Kyi human ang kapin lima ka tuig nga pagkapriso sa dihang siya gipakanaog sa puwesto sa usa ka military kudeta niadtong 2021.
Sa pamahayag sa military leader nga si Min Aung Hlaing, gibutyag niining gipagaan ang nahabiling sentensya ni Suu Kyi ug gibalhin kini sa “designated residence,” nga epektibong house arrest.
Gipakita usab matud pa sa state media ang hulagway sa 80-anyos nga si Suu Kyi nga naglingkod kauban ang duha ka naka-unipormeng opisyal. Bisan paman niini, nagpabiling limitado ang impormasyon mahitungod sa iyang aktwal nga kahimtang.
Sumala sa iyang anak nga si Kim Aris, nagduda siya tungod kay hangtud sa karun matud pa wala pa gihapoy konkretong pamatood nga buhi og luwas ang iyang inahan.
Sigon pa niini nga ang migawas nga hulagway kuha pa niadtong 2022.
Sigon usab sa legal team ni Suu Kyi nga wala silay nadawat nga opisyal nga abiso mahitungod sa iyang pagbalhin sa house arrest.
Si Suu Kyi, nga gihatagan og Nobel Peace Prize niadtong 1991, nahimong simbolo sa pro-democracy movement sa Myanmar ug unang nabutang sa pwuesto niatong 2015 human ang mga reporma sa nasud.
Apan sukad sa kudeta niadtong 2021, siya nag-atubang sa sunod-sunod nga kaso nga gitawag sa iyang mga tagasuporta isip hinimo-himo lang.
Ang iyang sentensya nga miabot sa 33 ka tuig kanunay usab nga gipasidan-an.
Sumala sa mga analyst, mamahimong senyales sa posibleng pag-usab sa iyang status ang kalit nga anunsyo samtang gisulayan sa military junta nga minusan ang international isolation sa nasud.
