BUTUAN CITY – Nagpadayon pa ang imbestigasyon sa kapulisan sa Butuan City Police Station 1 aron masuta ang motibo ug kung kinsa ang responsable sa pagpatay sa usa ka ulitawo kinsa napalgan na lang nga wala na’y kinabuhi kaganinang sayon sa buntag sa kasagbutang bahin sa Purok 1, Brgy. Bading ning siyudad.
Naila ang biktimang si Socrates Calo, 45-anyos, residente sa Purok Liloan, Brgy. Agusan Pequeño ning siyudad.
Sigon sa manghod niining si Herbert, gi-adtuan na lang sila sa ilang silingan og gipahibalo sa nahitao sa iyang maguwang kinsa taud-taud nang naglahi og puyo.
Wala na siya’y kasayuran sa mga kalihukan niini apan aminado kining nadala kini sa iyang mga barkada dungan sa pagklaro nga blangko siya kung duna ba kini bisyo nga posibleng makutay ngadto sa iyang kamatayon.
Duna matud pa’y samad-linubaan sa nagkada-iyang parte sa lawas ang iyang maguwang apil na sa li-og.
