BUTUAN CITY – Managlahi ang rason sa mga indibidwal nga mi-avail sa voter’s registration nga midalikyat sa Commission on Elections kon COMELEC-Butuan ning unang adlaw sa maong kalihukan.
Usa na niini si Winefreda Garupa kinsa gustong mubalhin og lugar diin siya makabotar gikan sa Brgy. Limaha ngadto na sa Brgy. Libertad nga parehong sakop ning siyudad.
Samtang nagpa-reactivate usab sa iyang rehistro si Alvin Yañez, 26-anyos nga residente sa Brgy. Bonbon ning siyudad sa Butuan human nga na-erase ang iyang pangalan tungod sa pila ka higayon niyang wala na pagbotar human nagtrabaho sa Davao City sulod na sa walo ka tuig. Iyang gipahimuslan ang bakante niyang mga oras karong adlawa aron ma-reactivate ang iyang pangalan.
Samtang tumang kalipay usab sa 19-anyos nga si Efren Felipe Marquez nga makabotar na siya sunod tuig human nga sayong nahuman ang iyang pagparehistro.
Gikalipay usab sa iyang amahang si Juanito ‘Nitoy’ Marquez ang maayong pagdumala sa COMELEC-Butuan sa ilang rehistrasyon.
Plastar matud pa ang tanan ug sayo usab nga nangabli ang maong buhatan rason nga dali rang nahuman ang iyang anak nga iyang gi-ubanan tungod kay unang rehistro man niya kini.
