BUTUAN CITY – Gipadayag sa mga abogado ni kanhi Pangulong Rodrigo Duterte ngadto sa International Criminal Court kon ICC nga nagkaluya na ang panglawas niini samtang gidetine sa ilang detention facility sa The Hague, Netherlands.
Sigon sa iyang mga abogado, magsige matud pa kini’g katumba, makalimot ug pirming gibantayan pinaagi sa video tungod sa risgo nga matumba.
Gihangyo karon sa iyang mga abogado ang ICC nga ipakita ang video ug mga rekord nga magpamatuod sa iyang kahimtang.
Wala pa sila nangayo og temporaryong pagpagawas niini apan gusto nila nga tan-awon pag-usab sa korte ang iyang detention tungod sa iyang panglawas.
Madumdumang gidetine si Duterte sa ICC tungod sa reklamong crimes against humanity atol sa kampanya kontra droga panahon sa iyang administrasyon.
