BUTUAN CITY- Hugot nga gilimod ni House Committee on Justice Chairperson Representative Gerville Luistro ang alegasyon ni Vice President Sara Duterte nga adunay mga magbabalaod nga mingkita matud pa sa Impeachment Case batok sa Bise Presidente. Gibarogan ni Luistro nga walay bisan unsang tanyag, pagpanghandlok o pa-abano nga natigayon samtang gidungog sa House Justice Committee ang reklamo batok kang Duterte sulod sa 2 ka buwan. Gihatagan og gibug-aton pa sa magbabalaod nga ang impeachment usa ka proseso nga constitutional nga dili kinahanglang malangay.
Matud niini, pagkahuman sa sponsorship speech ug dibate sa plenaryo sa Lunes, Mayo 10, gilaoman niining himuon gilayon ang binotaray kung ipadayon sa Senado ang Articles of Impeachment batok kang Duterte. Tubag kini sa magbabalaod sa mga alegasyon sa Bise Presidente ug ni Senator Imee Marcos sa daw mingkita matud pa ang House Justice Panel sa Impeachment ug adunay epekto matud pa sa magbabalaod kung mobotar nga pabor o dili sa Impeachment.
Kumpyansa usab si Luistro nga makakuha og igo nga boto sa Kamara aron mapadala sa Senado ang Impeachment Complaint. Sigon sa mga magbabalaod, kapin 200 ka mga kongresista na matud pa ang mipadayag og suporta sa Articles of Impeachment lagpas sa gikinahanglang 106 nga boto o 1/3 ka miyembro sa Kamara.
Samtang, minglaom usab ang Chairperson sa Committee nga modaog ang konsensya sa mga magbabalaod sa ilang pag-boto. Sumala niini, kinahanglan matud pang huna-hunaon sa magbabalaod ang pinakamaayong interes sa nasud human gisusi ang mga ebidensya ug argumento sa kaso.
Kini taliwa sa ubang mga factors nga gikonsidera sama nalang sa mga Political Affiliation ug ang umalabotay nga National Elections sa tuig 2028. Gipadayag usab ni Luistro, nga lisud nga madepensahan ang Impeachment complaint batok kang Duterte tungod sa bug-at matud pa nga mga ebidenstang gi-presentar sa mga complainant.
Gi-awhag niini ang kampo sa Bise Presidente nga magyag-yag og kaugalingong ebidensya adiser paman adunay pinal nga desisyon kalabot sa maong hisgutanan.
