BUTUAN CITY – Gitun-an karun sa Iran ang bag-ong proposal sa Estados Unidos aron tapuson ang giyera sa Middle East samtang mikusog ang kontrol sa Iran sa Strait of Hormuz.
Sumala sa mga taho sa shipping industry, sigon sa maritime intelligence firm nga Lloyd’s List nga sirado nga ang nasangpit nga strait human magpatuman og mas hugot nga clearance system ang Iran para sa mga barkong moagi niini.
Gika-ingong ang Iran nagtukod og bag-ong ahensya nga maoy mohawid sa pag-apruba sa pag-agi sa mga barko sa ruta, nga gikonsidera nga usa sa pinakamahinungdanong shipping lanes sa kalibutan.
Tungod niini, gibana-banang anaa sa 1,500 barko ug sobra sa 20-mil ka tripulante ang na-stranded sa Persian Gulf, sumala sa International Maritime Organization (IMO).
Sa usa ka maritime forum sa Panama, gibutyag sa secretary-general sa International Maritime Organization nga ang mga apektadong tripulante mga inosenteng trabahante nga karun naipit sa giyera sa Amerika ug Iran.
Samtang kampante usab si U.S. President Donald Trump nga mamahimong matapos gelayon ang giyera ug gika-ingong “going unbelievably well” ang mga hisgutanan para sa kalinaw.
Bisan paman, nagpasidaan usab siya nga mamahimong magpatuman og “higher level” military strikes ang U.S. kung balibaran sa Iran ang hanyag niini.
Bisan paman sa tensyon, dyutay nga mikunhod ang presyo sa lana sa pangkalibutanong merkado diin ang Brent crude ug West Texas Intermediate parehong mikunhod sa ilalom sa 100 dolyares kada bariles tungod sa paglaum nga makabaton pa gihapon og peacetalk sa rehiyon.
