BUTUAN CITY -Gikumpirma ni PMajor Renel Serrano, station commander sa Cabadbaran City Police Station nga nakasuhan na ang mga suspek sa pagkahanaw ni tetsir Nelmar Blancaflor Viray sa sayong bahin ning bulana.
Si Viray ang Butuanong maestro nga nagtudlo sa Tagbungabong Elementary School sa RTR, Agusan del Norte kansang pagkahanaw gi-angkon na nila Bryan Fil Montaño ug Mackie Tañola nga tungod kay ila kining gipatay pinaagi sa paglumos ug pagluba.
Sa eksklusibong pakighinabi sa Bombo Radyo Butuan ,unang gipasabot ni PMaj Serrano nga tungod kay suspek na sila Tañola ug Montaño, dili na sila makonsiderang persons of interest human napasaka pinaagi regular filing sa City Fiscal Office sa Cabadbaran ang mga kasong murder, robbery ug carnapping.
Sumala ni Serrano, officially released na ang duha ka suspek apan mas gipili sa mga suspek ang bulontaryong pagpundo gihapon sa ilang police station tungod sa kahadlok sa ilang seguridad kung anaa sila sa gawas.
Gipasabot ni PMaj Serrano nga dili pa nila ma-detain ang maong mga suspek tungod kay wala pa sila’y warrant of arrest ug magkinahanglan pa usab sa body of the crime nga maoy magpamatuod nga duna’y natigayong kremin ilabina kung namatay ang biktima kansa magkinahanglan pa usab og ipakitang death certificate.
Gidugang sa hepe, nagpadayon pa gihapon ang ilang imbestigasyon kung tinuod ang mga gi-angkon sa suspek nga human ang pagpatay sa biktima gipa-anod lang kini sa dagat kondiin hangtud karon, wala pa makita ang lawas sa magtutudlo.
Apil sa gi-angkon sa mga suspek nga bag-uhay pa lang nila naka-ila ang biktima ug adtong adlaw sa insidente nanglaag sila sa Cabadbaran City ug naplanohan na matod pa nilang patyon ang titser ug kuhaon ang dalang kwarta ug motor niini.
