BUTUAN CITY – Dili pa makapasaka og bisan unsa mang kaso ang kapulisan sa Cabadbaran City, Agusan del Norte batuk sa mga persons of interest sa pagkahanaw ni titser Nelmar Viray hangtud nga dili pa kini makit-an.
Sa eksklusibong pakighinabi sa Bombo Radyo Butuan, gibutyag ni PMajor Renel Serrano, dili gihapon dawaton sa piskaliya kung magpasaka sila og kaso bisan pa man sa extra judicial confession nila Macky Tañola, residente sa Moncayo, Davao de Oro ug barkada niining si Bryan Phil Coquilla nga taga-Cabadbaran City sa maong kremin.
Kini tungod kay magkinahanglan man og body of the crime nga maoy magpamatuod nga duna’y natigayong kremin ilabina kung namatay ang biktima nga magkinahanglan pa usab og ipakitang death certificate.
Kini apil matud pa sa mga rekisitos sa pagpasaka og kaso gawas sa reklamante ug mga saksi, kondiin sa kaso ni Viray, ang extra judicial confession sa mga suspek ang lig-ong ebidensya.
