BUTUAN CITY – Tumang kalipay ang gibati sa duha ka mga persons with disabilities sa Brgy. Lapu-Lapu ning siyudad human natunulan og tag-usa ka paresan sa crutches nga dakong tabang sa palyado na nilang paglakaw.
Unang nakadawat nini si Jonathan Pomaris kinsa na-stroke ug gi-atiman kanunay sa iyang inahang si Erlinda kinsa nagpasalamat og dako tungod kay makalakaw-lakaw naman unya ang iyang anak tungod sa nadawat nga crutches gikan sa Faith Baptist Church sa pagpanguna ni Pastor Vicente Serrano.
Susamang pasalamat usab ang nabungat sa 73-anyos nga si Luzviminda Sabuquena sa Brgy. Buhangin kinsa duha ka tuig nang na-stroke apan inanay nga nakarekober.
Iyang gibutyag nga dakong tabang na kini kaniya ilabina sa iyang inadlaw nga paglihok-lihok ug dako ang iyang pagpasalamat tungod kay sa suki pang sibyahan niya kini nadawat kondiin gikan sa sign-on hangtud sign-off ang pagpaminaw niya sa Bombo Radyo.
Samtang kinasing-kasing usab nga nagpasalamat ang duha ka mga visually-impaired nga indibidwal human nahimong benepisyaryo sa food packs nga gipatunol ni Nanay Rosario ‘Sayong’ Aruj pinaagi sa Bombo Radyo ngadto sa maong hut-ong sa katilingban.
Unang nagpasalamat si Joseph Richard Petallar dihang nadawat ang lima ka kilong bugas nga duna pa’y pakapin nga de-lata ug itlog. Iyang gibutyag nga dakong tabang na kini sa ilang pamilya ilabina karong nagpadayon pa ang community quarantine nga hatud sa COVID-19.
Susamang pasalamat usab ang nabungat ni Jovy Palero kinsa dili makalakaw human na-igo sa sakit nga polio.
