BUTUAN CITY – Iyahay na lang og diskarte ang mga drivers sa mga de-pasayruang sakyanan ning siyudad aron makasugakod sa grabeng pagmahal sa presyo karon sa mga produktong petrolyo.
Sa paglibot sa Bombo News team sa mga gasolinahan ning siyudad, namatikdan nga nanghuyhoy ang abaga sa mga driver ssa de-pasayruang traysikol ug multicab tungod sa bigtime oil price hike nga gipatuman karong adlawa.
Sigon ni Randy Dayaday nga taga-Brgy. San Vicente ning siyudad, ang iyang himuon mao ang pagpatubil didto sa pinakabaratong gasolinahan kondiin sa iyang ruta, adto matud pa siya magpatubil sa PetroGas sa may Ochoa Avenue.
Alang kaniya, mu-abot sa 400 hangtud 500-pesos ang iyang madala sa iyang pamilya tungod kay iya mang kaugalingon ang iyang gimanehuang traysikol.
Bisan si Joselito Agravante kinsa nagbiyahe sa route 10 nga biyaheng Brgy. Dumalagan hangtud Ampayon ug vice versa, blangko pa kung unsa ang buhaton sa grabeng pagtaas sa presyo sa lana ning adlawa.
Ang iya matud pang 200-pesos nga tubil, usa lang kini ka round trip ngausahay wala pa’y kargang pasahero rason nga alkansi kaayo siya sa biyahe.
