BUTUAN CITY – Usa ka bus driver og duha ka conductor sa kompanyang Bachelor Express Incorporated, Inc kon BEI ang nagpositibo sa ginadiling druga base sa gihimong random screening test sa mga sakop sa Philippine Drug Enforcement Agency kon PDEA-Caraga.
Kini nga resulta base sa natapos na nilang testing ngadto sa 159 ka mga bus drivers, 136 ka mga conductors, ug usa ka canvasser sa maong kompanya ingon man 59 ka mga van drivers, upat ka multicab drivers og usa ka van dispatcher kon kinatibuk-ang 360.
Kini subay na usab sa gilusad nilang ‘Oplan Undaspot’ ubos sa gipatuman nilang Oplan Harabas subay sa nagkaduol nga pag-obsrba sa kalag-kalag.
Sa eksklusibong pakighinabi sa Bombo Radyo Butuan, gipadayag ni PDEA-Caraga spokesperson Dindo Abellanosa nga gipa-ilalom sa screening test ang ilang mga urine samples gamit ang testing kit.
Ang mga nagpositibo, gipa-ilalom gilayon sa counseling og orientation sa mga sakop sa ilang Preventive Education and Community Involvement Section aron mahatagan og kahibalo saa ilang mamahimong dangatan.
Human niini, ipa-ilalom pa sila sa confirmatory testing ug higayong makumpirmang naggamit gyod sila og ginadiling druga, ila gilayong isubmite ang resulta sa drug test ngadto sa kadumalahan sa maong kompanya alang sa ila na unyang pag-aksyon sama sa pagpa-ilalom kanila sa rehabilitasyon.
Gidugang sa opisyal nga siento-porsientong kasaligan ang confirmatory testing tungod kay masayran usab dinhi ang klase sa druga nga gigamit sa nagpositibo sa drug test.
