BUTUAN CITY- Pukosan ang daw unexplained wealth ug mga isyu sa Statement of Assets, Liabilities, and Net Worth (SALN) ni Vice President Sara Duterte ang sunod nga impeachment hearing sa Kamara, kung asa gimando ang pagpatwag kang kanhi Senador Antonio Trillanes IV ug pipila ka ahensya sa gobyerno.
Sumala ni House Committee on Justice Chairperson Gerville Luistro, nagpagawas ang komite og subpoena alang kang Trillanes aron obligahon kini nga motambong sa gikatakadang hearing sa umalabot nga Abril 22. Si Trillanes gi-ila nga parte sa Saballa et al impeachment complaint, partikular sa hisgutanang unexplained wealth sa Bise Presidente.
Gawas sa kanhi senador, gikomperma usab ni Luistro nga imbitado ang mga opisyal gikan sa Anti-Money Laundering Council (AMLC). Gilaoman usab ang pagsumite og mga dokumentong adunay kalabotan sa mga bank transactions sa magti-ayong Sara ug Manases Carpio. Lakip usab sa gilaomang motambong sa hearing ang mga representative gikan sa Securities and Exchange Commission (SEC), Bureau of Internal Revenue (BIR), ug Office of the Ombudsman.
Ang gkatakdang panagtapok sa komite magsilbing clarificatory hearing aron klarohon ang mga alegasyon batok sa bise presidente, lakip na ang daw dili kompletong pagdeklara sa iyang mga bahandi ug kabtangan. Samtang giklaro ni Luistro nga gipasalig na niini sa mga miyembro sa komite ang pinal nga desisyon kung ipatawag pag-usab si Ramil Madriaga, ang gi-ilang self-proclaimed bagman, sa mga sunod nga imbestigasyon.
