BUTUAN CITY- Nakatala og ubos ug mingus-os sa pinaka-ubos nga lebel sulod sa 9 ka buwan ang remittances sa mga Overseas Filipino Workers (OFW) niadtong buwan sa Pebrero, apan nagpabiling taas ang kinatibuk-ang pondo nga nasulod sa nasud karung tuiga.
Base sa gipagawas nga datos sa Bangko Sentral ng Pilipinas (BSP) naidtong Miyerkules, minghapak lang sa $2.786 bilyon o ₱167.08 bilyon ang natalang cash remittances o ang mga gipadalang ming-agi sa bangko niadtong Pebrero. Mas ubos kini kompara sa $3.020 bilyon o ₱181.11 bilyon nga natala niadtong buwan sa Enero.
Kini na ang pinaka-ubos nga lebel nga natala sukad niadtong Mayo 2025. Bisan paman mas taas kini kompara sa $2.716 bilyon nga natala niadtong Pebrero sa miaging tuig. Gikan sa kinatibuk-ang cash remittances alang sa nasangpit nga buwan, naggikan ang $2.25 bilyon sa mga land-based workers, samtang ming-amot usab og $0.53 bilyon ang mga sea-based workers.
Taliwa sa pag-ubos niadtong Pebrero, gitaho sa BSP nga ming-abot gihapon sa $5.806 bilyon o ₱348.19 bilyon ang year-to-date cash remittances sa unang duha ka buwan sa tuig—mas taas sa $5.633 bilyon sa susamang panahon niadtong 2025.
