BUTUAN CITY – Luwas ang tanang mga Filipino nga nagpuyo ug nagtrabaho sa St. Vincent sa Grenadines – ang lugar diin nahimutang ang mibuto na nga La Soufrière volcano, human sila gihikling sa lima ka mga cruise ships uban ang mga nationals sa maong island nation sa Caribbean.
Sigon ni Alan Tulalian direkta gikan sa Trinidad and Tobago sa Caribbean Islands, niadtong Biernes sa alas-8:45 sa buntag – oras sa maong nasud, unang mibuto ang La Soufrière volcano sa St. Vincent nga gisundan sa duha pa ka pagbuto kondiin ang major eruption nga mao ang ikatulo nga natigayon pasado alas-6:35 sa gabii.
Sa eksklusibong pakighinabi sa Bombo Radyo Butuan, gipadayag ni Tulalian nga 42 ka tuig na ang nakalabay human ang katapusang pagbuto niini niadtong tuig 1975. Base sa iyang monitoring, anaa sa 60 ka mga Pinoy ang nagtrabaho karon sa St. Vincent ug sa maong ihap, duha ka mga Pinoy ang nagpuyo sa mismong danger kon red zone apan nahikling na silang pareho sa luwas nga dapit.
Gidugang pa ni Tulalian, ang mga gihikling gikan sa St. Vincent, andam sagupon sa uban pang mga isla sama sa Barbados, Antigua, Dominica, Grenada, St. Lucia ug Trinidad and Tobago, basta natupukan na sila og COVID-19 vaccines.
Tumong niini nga dili miusamot ang COVID-19 situation sa Caribbean Island.
Pinakagrabeng na-apektuhan matud pa sa pagbuto sa bulkan ang Barbados tugod kay ang ilang adlaw, nahimo nang gabii tungod sa kabaga sa ashfall.
