BUTUAN CITY – Mibati na og kalisang ang mga overseas Filipino workers kon OFWs nga atua pa sa Myanmar tungod sa nag-anam na kagrabe sa mga duguong protesta sa katawhan batuk sa kudeta nga nagsugod niadto pang Pebrero 1 ning tuiga rason sa kadaghan na sa mga namatay’ng demonstrador.
Kini ang hinungdan nga duna’y mga OFWs nga mubiya na sa Myanmar karon ug ugmang adlawa, Miyerkules, Marso 18 tungod sa kadelikado na sa maong nasud dili lang alang sa ilang katawhan kondili apil na sa mga foreigners sama sa mga Pinoy.
Kini ang paghulagway ni Namie Suazo kinsa kapin na sa usa ka tuig nga nagtrabaho sa usa ka school office sa capital Yangon apan mibati na og nerbyos tungod sa duguong senaryo sa kada-adlaw nga protestang gihimo sa mga anti-coup demonstrators.
Sa eksklusibong pakighinabi sa Bombo Radyo Butuan, gipadayag ni Suazo nga kini ilabina nga naglusad na ang mga police og house-to-house raids aron pangsikupon ang mga tawong madudahang misimpatiya sa mga demonstador kondiin pamusilon pa ang ubang rason nga kada-adlaw siyang makadungog og mga buto-buto sa armas nga nagpasamot sa iyang nerbyos.
Gidugang pa niini nga ang migawas nga official figure sa mga namatay nga demonstrador human gipamusil sa mga riot police, wala pa’y labot sa wala pa ma-account sa pipila ka mga townships nga mi-abot matud pa sa kapin 50, base na sa update nga gihatag kanila sa Philippine Embassy.
Sa iyang kabahinan, daghan siya og video nga nakuha diha sa kadalanan gikan sa iyang mismong apartment nga wala pa niya gi-upload alang sa iyang siguridad.
