BUTUAN CITY – Gikumpirma ni Clarissa Rosales, ang terminal manager sa Port of Masao sa may Brgy. Lumbocan ning siyudad sa Butuan nga gipahibalo na siya sa iyang counterpart sa Legaspi City nga gi-quarantine na sulod mismo sa tugboat ang mga tripolanteng nagpositibo sa COVID-19.
Wala na matud pa sila gipanaog bisan og pulos sila asymptomatic hangtud sa pagkutlo niini nga balita.
Sa eksklusibong pakighinabi sa Bombo Radyo Butuan, gipadayag ni Rosales nga palisiya na nila nga wala’y pana-ugong tripolante sa barko kung mudunggo sa pantalan ilabina kung mga foreign vessels rason nga wala matud pa’y nakakanaog nga mga crews sa maong tug boat ug barge, taliwa nga una nang nabani-og nga usa kanila ang nakagawas sa pantalan ug naka-uli na sa Zamboanga City diin siya na-isolate.
Hinuon alang sa mga inter-island vessels, nakalatid matud pa sa resolusyon sa Inter-Agency Task Force nga tugutan silang magpanaog og tripolante kung kinahanglanon kaayo sama na lang kung duna’y paliton nga mga batakang panginahanglanon sama sa pagkaon.
