BUTUAN CITY – Nag-iyahay og promo ang mga flower vendors nga nagkatag sa nagkada-iyang istrathikong lugar ning siyudad sa Butuan subay sa paghandom ning adlawa sa adlaw sa gugma kon Valentine’s Day.
Kung ang mga flower vendors nga duna’y plastadang stalls, namaligya og tag-usa ka libo ka pesos sa mga pulang rosas alang sa usa ka dosena, gikunhuran kini og katunga sa mga anaa lang sa kadalanan ug naghanyag sa mga lumalabay.
Sama ni Jun Cagadas nga taga-Brgy. Alubihid, Butuan City, kinsa mitabang sa iyang asawa pagpamaligya og buwak aron madugangan ang ilang kita.
Sa eksklusibong pakighinabi sa Bombo Radyo Butuan, gipadayag ni Cagadas nga tag-500 pesos lang ang ilang tag-usa ka dosenang pulang rosas nga gi-bouquet na samtang 300-pesos usab ang tunga sa dosena ug 150-pesos ang tulo.
Samtang na-aktuhan usab ning sibyahan ang pagpalit og usa ka bouquet sa rosas sa inahang si Rebecca Cuenco, taga-Purok Sibuyas, Brgy. Golden Ribbon ning siyudad alang sa iyang anak nga si Vanessa kinsa nagsa-ulog ning adlawa sa ilang ika-36 ka tuig nga adlaw’ng natawhan.
Na-aktuhan usab ning sibyahan ang mister nga si Allan Nalan nga taga-Relocation Site sa Brgy. Doongan ning siyudad nga nagpalit og usa ka boquet sa buwak alang sa iyang misis nga si Ivy ingon man heart balloon alang sa ilang anak nga si Jacob.
Sigon ni Allan, nataymingan lang nga sa iyang pag-agi duna’y nag-display og mga Valentine’s presents rason nga nakapalit siya ilabina nga gikan pa siya sa kauluhang Manila.
Gawas sa iyang Valentine’s presents, sa ilang panimalay lang matud pa sila magsa-ulog og Valentine’s Day uban sa iyang pamilya.
Apil sa na-aktuhan ning sibyahan si Mimi Butron kinsa mipalit og heart balloons alang sa iyang banang si Alfredo tungod kay ika-22 nila nga wedding anniversary karong adlawa.
