BUTUAN CITY – Mipasalig ang mga rehiyunal nga buhatan dinhi sa Caraga Cooperative Development Authority kon CDA ingon man Land Transportation, Franchising and Regulatory Board kon LTFRB ug Office of the Transportation Commission kon OTC nga tabangan nila ang bag-ong administrasyon sa Diamond Transport Services Cooperative kon DATSCO.
Kini human nagmalampuson ang ilang pinaka-unang general assembly kagahapon taliwa nga magtulo ka tuig na ang ilang operasyon.
Sa eksklusibong pakighinabi sa Bombo Radyo Butuan, gipadayag ni Romeo Ednilan, usa sa lima ka mga bag-ong napiling Board of Directors kon BOD sa kooperatiba nga malipayon silang hapsay nga napahigayon ang general assembly uban sa pag-obserba sa mga opisyal sa nasangpit nga mga ahensya.
Kini taliwa nga alas-dos na sa hapon nila nakab-ot ang quorum taliwa nga sa alas-otso pa lang sa buntag nagsugod ang ilang rehistrasyon didto sa covered court sa Brgy. 8, lungsod sa Buenavista diin gihimo ang asembliya.
Didto gipresentar sa maong mga ahensya ang ilang mga nakitang problema sa DATSCO kansa giresolba gilayon aron ma-isyuhan na sila og provisional authority ug Certificate of Good Standing kon CGS gikan sa OTC kansa maoy rekisitos alang sa pag-renew sa ilang prangkisa sa ingon makabalik na pagpamasada ang ilang mga yunit.
