-- ADVERTISEMENT --

BUTUAN CITY – Nasikop sa mga otoridad sa Mexico ang gitu-uhang drug lord nga si Fausto Isidro “Chapo Isidro” Meza Flores, nga apil sa Top 10 Most Wanted list sa Federal Bureau of Investigation (FBI) sa Estados Unidos.

Gipangunahan sa Mexican special forces ang operasyon batok kang Meza Flores sa Guasave, Sinaloa, diin misikad pa ang pinusilay human gika-ingong misukol sa mga otoridad ang iyang mga kauban.

Nadakpan usab sa maong operasyon ang usa sa iyang mga sakop ug silang duha gidala dayon ngadto sa Mexico City.

Si Meza Flores, 44 anyos, giila nga lider sa Meza Flores Organization nga nailhan usab sa ngalan nga Guasave Cartel.

Aktibo na matud pa ang maong grupo sa ilegal nga patigayon sa droga sukad pa sa dekada 1990, lakip na ang fentanyl, cocaine, heroin, methamphetamine ug marijuana.

-- ADVERTISEMENT --

Niadtong 2025, na-apil siya sa Most Wanted list sa FBI tungod sa mga kasong may kalabotan sa drug trafficking, kidnapping, extortion ug torture.

Gidudahan usab siya nga nalambigit sa pagpasulod ug pag-apod-apod sa gibana-banang 20 milyong fentanyl pills nga nasakmit sa mga otoridad niadtong 2024.

Una na siyang gikasohan sa Estados Unidos kalabot sa drug trafficking niadtong 2012 ug 2019.

Sigon sa mga imbestigador, nakigkunsabo usab siya sa mga naghimo ug namaligya og ilegal nga droga gikan sa 2005 hangtod 2019.

Sa wala pa niya tukora ang kaugalingong organisasyon, nahimong miyembro una si Meza Flores sa Beltrán Leyva Organization, apan mibulag kini tungod sa pagkabahin-bahin sa maong grupo.

Nakatabang usab matud pa ang intelligence information nga gikan sa Estados Unidos aron masubay ang nahimutangan ni Meza Flores ug mapahigayon ang operasyon nga misangpot sa iyang pagkasikop.

Nahitabong ang pagdakop taliwala sa mas gipakusog nga kampanya sa Mexico batok sa ilegal nga droga, human gipamugos ni US President Donald Trump nga palig-onon sa gobyerno sa Mexico ang pagpakigbatok sa mga drug cartel ug pagpupuslit sa fentanyl ngadto sa Estados Unidos.